Home အေထြေထြ သတင္း / thongpa ccaw 2013 January saw a pou paw Zotung Post

2013 January saw a pou paw Zotung Post

E-mail ပံုႏိွပ္ပါ PDF

 

Kum ryn 2012 kum lungkhu kya vae ram lungkhu abapi lang a rulae kuh paw.
Question ;  Vae ram Demokrasi ram lang a tan te paw mou a kaethung hua naw a um..?..?
Vae ram hynh 2011, March 31 nin te Dimokrasi accoza thawpaw nynh a uk te a rulae kuh naw pataepi a um. Tuh e a rulae kuh paw kyaze 2012 kum lungkhu a rulae kupaw hynh a dynnaw te a kaw lang thyh te zei a thua. Ccanpaw mah a ru lae kuh paw zei kou lei paw patae pi a um ung.
  1. Ram hanlang ( Nan-ngan-zei ) keiccu thung kum saepi thungccah hae paw (1988  kya tekacco sia imua ccia khae tu, Ko Min Ko Naing te a bang hae, U Khun Tun Oo, Zar Kana… cth….) thung-inn kyate pataepi a lue sah hae.
  2. Accoza nynh 1988 kum te 2011 kum cia Daw Aung San Suu Kyi tuh thung-inn kya saw kahcce langte amaw a inn kya khe kum saepi cia khung sahlama, 2011 kum te lue sah hae zah, 2012 Kum kyate Ramccan lang ccia te inn lae pae naw kaw khah luezaelae lang a pya vae. 2012 kya (1) Thailand, (2) Europe ram 4 , (3) American, (4) India ram lang a cceih vae. A ro mawze American (Hawaii) te S/ Korea ram lang zemah ccia lang cite a paccyn ku.
  3. Vae ram accoza nynh Kum 20 lae cia palei adokhaw paw NLD ( National League for Democracy ) party tuh upadi thyte phe a chih vae paw khah, a thaw lang te  Party mapontin naw kaw bua pya chui hae zah, 2012 kum April saw kya alaku mee sang naw kyaze mee kua nya ku bua te palime lua ku bua naw kaw pyazah, Daw Aung San Suu Kyi te NLD party kya e luh 43 tuh palime rya hae mue hae zah, vae ram hanlang khuakhan tu, ryahae naw kya meeting a kae bua vae hae.
  4. American Dollar, Euro, te ram taky kya e phua miakaw hynh lang maw U Ne Win she lya te phua ru kho naw hynh a lah um vae lei paw, Vae ram Demokrasi ram lang oun tang te 2012 April nin 1 nin te American Dollar te Vae phua ru naw tuh accoza nynh 1 US$ = 818 Ks te tazavuin phua ru khonaw (Money Exchange Counter) khah a hung vae.
  5. 2012 kum lungkhu World Bank, IMF te Asia Development Bank ( ADB ) khah vae ram kya zung (Branch Office) oun phuin hae za, World Bank nynh Vae ram hanlang American Dollar 80,000,000/ ( US$ 80 Millions) lae bawm naw pya zah, ADB nynh mah vae ram hanlang bawmnaw pataepi a pya.
  6. American te EU nynh vae ram uk kunaw khah a nawccaw khyh keiccuze sipuazei lang te ccuezae kunaw a khaw sung paw khah, accoza thawpaw nynh ram a uk tu dang hynh do zah a naw a ccaw vae keiccuze, 2012 kum te sipuazei thuakaw khah bua a hung pya chui vae.
  7. Vae ( 67 ) naw New York UN meeting pi kya vae ram ccamada U Thein Sein tuh laephi pynpi uktu bawi phe ccin naw kya bya ( Speech ) ho naw ccyh a mue bua. E hynh vae ram lungkhu ze uktu bawi alehua paw nynh UN meeting pi kya masty bya ho kho naw ccyh a mue paw nynh a thua.
  8. 2012 kum lungkhu kya zae ram ccungccaw hanlang ccungkia naw a rae kho tu a minthang huacce ccungccaw luh 15 kya ze U Thein Sein te Daw Aung San Suu Kyi khah Times Mekazi nynh phu-enaw lasung a pya bua hae.
  9. Accoza thaw paw nynh ram ukkunaw a ccia khae paw hynh mih naw a ccaw kei ccuze, ram alele naw e uktu bawi hae tuh 2012 kum lungkhu vae ram uktu bawi hae ry te tung ku khylang cite vae accoza kalan oun pae bua hae. American, England, Norway, Japan, Australia, Newzeland, Canada, Demark, Germany, France…. Cth … te ram 20 lae kya e uktu bawi hae 2012 kum vae ram lang oun pae hae.
  10. American, Japan, Germany…cth… te ram 20 lae kya e company vae ram kya Company phuin lang cite ramccan e sipuazei tua tu hae 2012 kya vae ram lang oun do tua vae hae.2013 kum te vae ram lungkhu ram ccan Company a lele paw patae oun te vae cih cite ngaehoy lang a um.
  11. 2012 kum lungkhu accoza te Zo Rhawkaw ( CNF = Chin National Front ) tuh, ccaw kunaw te ram hanlang rya pynkheih lang law khonaw lang se tuh kute daenaw/ nginnaw a rae kho vae hae. Ccaccan paw accoza dou tu minphuin phin 11 te zema, Dae naw te ccaw kunaw a rae kho vae. ( Kachin rhawkaw te tuh rae kho loh khyh.)
  12. Rhawkaw accoza nynh a uk ccyh lyaze vae ram te ram ccang lang ccue te vae ram adou tu hae ccungccaw pataepi khah accoza nynh vae ram lungkhu lang tee khonaw kaw bua a pya hae. Mih min a thu paw ( Black List) ccungccaw patae pi khah mih min a thyaa paw ( White List) lang bua a rae pya hae. Tuh thuakeiccuze, langmaw lyaze, vae ram kya aphinphin lang te mih min thang paw ccungccaw pataepi khah vae ram lang pae bua lang pah taepi oun thua hae.
  13. 2012 kum te Vae ram lungkhu e Priveih Bank a lung hua kya tuh ATM Card te phua tho kho a thua vae. Ram ccang e VISA, MASTER, DINNER Card mah vae ram e ATM kya te phua tho ku kho a thua vae. Ram ccan ccungccaw hae nynh mih khua, mih ram kya dollar te thuasa, ccaccang paw mih maw phua te a nung kuh hae paw khah vae ram lungkhu kya ATM kyate vae ram phua lang te tho ku kho a thua vae.
  14. 2011 kum biamaw tuh rhawkaw accoza te a ccawkuh hua paw OoPain Company kyalya nynh ramccan te mawtaw re khonaw kaw hynh lah hoi zah, vae ram hynh laepi pynpi kya mawtaw mee aru hua naw ram a lah thua paw khah accoza nynh 2012 kum te ccungccaw miakaw ramccan e mawtaw re kho/ tee khae kho naw kaw a pya vae keiccuze, vae ram lungkhu mawtaw a thawpaw pataepi oun te zah, mawtaw me mah myarya a zoi hua vae. Langmaw lae mawtaw ahooy paw myarya alung hua vae. Car Show mah vae ram lungkhu 50 lae a um vae.
  15. 2012 December saw te Ram ccang ( Ram 200 ) kyate Western Unoin Bank kya te vae ram lang phua ky ku kho a thua vae. Vae ram te ramccang lang ze mah a ro maw ze ky ku kho oun thua vae cih.
  16. Langmaw lya a me myarya a ru te leih a lah re hae paw Han fon hynh 2011 January saw lya khe accoza nynh Ks 500,000 / te luduh hae kalan zua pah haeza, 2012 April saw kya te Ks 250,000/ te  Ks- 200,000 / me cite phin 2 lang te a me zoi te a zua vae. Han fon a kyn paw ccungccaw milu mah myarya a lung bua vae.A romaw 2013 January saw a thandyn te 50% lae ame zoi hua lang te fon bua zua pya lang vae cite accoza nynh a paccyn vae.
  17. 2012 December 1 nin te accoza nynh ADSL internet line tahku naw me khah langmaw Ks 500,000 / a thua paw khah Ks 120,000 / lang a me azoi sah bung vae.
  18. 2012 kum te accoza nynh GSM te WCDMA fon kyate internet mangkho naw a rae vae keiccuze, fon kyate internet a mang paw ccungccaw myarya a lung vae. Internet Café kalan ccia te internet a mang paw phe a zya hua vae. Inn vaw te Internet a mang paw myarya a lung vae.
  19. 2012 kum te vae ram te ramccan lang fon konaw me khah myarya a zoi langte Y-TALK a ci hae paw card te ram cccan lang fon ko khua a thua vae. USA ,1 Minit =15 Ks, Malaysia, 1 Minit =30 Ks, England, 1 minit =25 Ks… cth … te Ram 150 lae kalan a me myarya azoi lang te ko kho a thua vae.
  20. Japan, Korea, China(Taluh) te ASEAN ram 10 (Singapore, Malaysia, Thailand, Laos, Cambodia, Veitnam, East Timor Philipine, Indonisia, Brunei) ram e Hand fon miakaw 2012 kum te vae ram lang ccyn kute manglang  a zae vae. Vae ram hand fon zema, 2012 kum Japan, Korea, China, Thailand, Singapore ram lang ccyn kute manglang a zae vae. Aromawze, vae ram e fon hynh ram 90 lae kya manglang a zae langte vae accoza nynh paccyn naw a hoi.
  21. Accoza nynh varyn a khe keiccuze, ho ry paw ho ngan lei, zei ry paw zei ngan lei te accoza ry naw haw te kyalya zei a thua paw,  Journal/ ccadin ccaw kya mah 2012 August saw kyate accoza nynh khe vae lei te rythy te zei kho / ho kho a thua vae. Tuhkeiccuze, langmaw lya BBC,VOA, Free Asia Radio kyate thongpang  ngae hae paw khah 2012 kum te vae tuh Journal rythyh te a pou naw khua kya tuh Radio ngae vae lei te journal kya rythy te ria kho a thua vae.
  22. Langmaw U Ne Win kaw lya te praeveih ccadinccaw tho khonaw kaw hynh phe lah khe za, Atu 2013 April nin 1 kyate tuh praeveih ccadinccaw tho naw kaw bua kae pya vae cih oh cite accoza nynh 2012 December saw kyate kaw bua a pya vae keiccu hae ze, nintaky a pou paw praeveih ccadinccaw tho kho naw lang, jounal tho tuh a phu, phu 8 lou kaw tuh accoza kalan mapontin kunaw ccaw a nung vae hae.
  23. Langmaw accoza she lya tuh accoza hooy khyh, cite khahlang te sangmah ho ngan a um lei paw khah 2012 kum te vae tuh Upadi thawpaw oun pou vae zah, Accoza te uktuu boi hae nynh rya a law hae paw thuasa, ccaccan paw zemah thuasa, nawccaw a um khyhze, Myone kya e palih zung kya ccaw nung lang zah Sandah pia kho a thua vae. Dimokrasi ram a thua vae keicuze, 2012 kum kya sandah pia hae paw mah kou a lung vae.
  24. Laephi pynpi kyaze a kaethung hua paw te kaw ahoirung hua paw ram kya e Uktuu boi a thua paw , American ccamada Barack Obama tuh 2012 November nin 19 nin kya vae ram lang oun pae bua zah, Ccamada U Thein Sein te Vae ram Demokrasi lupi Daw Aung San Suu Kyi te a tung kuh hae.
  25. Accoza nynh kum 16 hang a khaw vae paw Yangon University kalan Obama nynh vae ram luduh kalan Bya ( Speech ) ho naw a rae lia te Yangon University tuh ramccan te innlae oun pae hae paw ccungccaw miakaw nynh mih pe kou a ki, Yangon University tuh ram takyh kya e University a phah kuh bua paw siainn lang bua a tang chui kho naw lang accoza nynh raelang vae cite paccyng naw a hoi vae. 2012 December saw te First Year Honors sia-imua hae khah Yangon University kya siainn kae naw kaw a pya vae hae.
  26. 1988 kum luduh hae sandah piah naw tuh Tekacco sia-imua hae kyate oun thozah, tuh ccyh lyaze, masty oun  thoty paw Rangoon Institute of Technology ( RIT) tuh accozah nynh 1996 kum te phe a khaw vae paw khah 2012 kum te accoza nynh bua a hung chui vae. E siainn hynh Engineer Degree daereih a pya naw hae, sia inn nynh a thua. A min hynh RIT kyate YTU ( Yangon Technological University) cite accza nynh 1993 kum te phe rulae vae.
  27. Laephi pynpi kya hlaw sah lang te a minthang bua paw, America paw Jackson Maraz tuh 2013 December kya Yangon khua piccu zinpyin ( People Square ) kya ccungccaw zua tu hae khe kho naw lang te a sekuh lang te Hlaw sah naw rae zah, vae ram e Hlaw sahthya hae paw ry te Thai ram e hlaw sathya hae paw, Slot Mechine hae ry te Stage Show rae hae zah, a dory paw mia kaw alakaw te do kho a thua keicccuze, ccungccaw milu 80,000 lae a do hae. Hynh hawte laephi pynpi kya a minthang paw ccungccaw nynh vae ram lang a lakaw te Hlaw sah lang oun ccia paw hynh vae accoza thawpaw nynh rya a law paw hynh ram takyh nynh mih naw accaw keiccu nynh  thua.
  28. Yangon khua kya mawtaw( Bas) cci kunaw mee lang hynh phua a noipaw akhin keiccuze, phua eleih naw kya vawsaw a um khyh naw lang cite 2012 kum te mawtaw cci kunaw paw IPAY Card te phua han paw mang kho a thua vae.
2012 kum e thongpang thah paw
  1. 2012 kum kya Rakhine te Bengali ( Kalaw )  minphuin rhaw dou kunaw a um keiccuze, ccungccaw patae chih hae a piaze inn lo syro pya kute, mae te inn a soi pya ku keiccuze, Rakhaine pine kya vawsawtung (Refugee) te inn lo hoi leite ccungccaw athung asang / pataepi a um hae.
  2. 2011 kum June saw te Kachin ram rhaw tuh a tho paw hynh 2012 phe thang lang cia rhawtuh dae kho khyh keiccuze, inn lo leite vawsaw tung paw Kachin minpuin athung asang /pataepi a um hae.
  3. 2012 November 11 nin kya Shwebo khua te nin thua lang me 35 a sawnaw kyate innry a sue kuh keiccuze, ccungccaw luh 5 chih zah, luh 25 hang vae maw a mue hae. Madalay, Sagaing, Pyin Oo Lwin, Shwebo, Mon Ywar, Mithitla khua e inn, phuraw te due pataepi a roh.
E avaw lang e No. 1 – 28 kya cia hynh 2012 kum lungkhu kya-e vae ram kya a rualae (or) a kaethung hua naw paw pataepi kya e abang zei paw thuazah, ccaccang paw zei kou leipaw mah pataepi a um cih. Vae ram hynh 2011 kum Dimokrasi ukku naw te a ccia khae takaw hae te accyh dyn tari paw kya a rulae kuh paw myarya rang zah, e haw te pou oun ccia kho lang a thuaze tuh a romaw ze mih lae ram haw te a kae thong paw ram lang solei oun tang cih cite World Bank te Asia Development hae nynh a ho hae.
Aromawze, Zotung ram mah Hand Fon mang kho oun thua vae cih.
Chin ram kya e Tidim, Falam, Hakha, Thantlan, Minda Kanpelet khua kya tuh Hand fon a mang kho vae hae. Thuasalama, Matupi khua tuh, mua a han paw nynh pong a khaw keiccuze atu nin cia hand fon mang lang zae kho loh khyh. 2012 kum kyate accoza nynh Matupi myone e mua a hanhan paw khah thawmaw te accung. Tingsi khua te nithua lang me 3 a saw naw kya Muinsado taw mua  kya tuh lang maw Miraw accoza nynh Lungphe kya ccaw zei hae zah laekaw a uu sya paw khah 2012 kum kya phe a muih vae hae. Tuh e mua tuh rili kya te pei 9800 lae han zah, Chin pine kya ccan 2 naw ahan hua paw mua thuazah, Matupi myone hanlang GSM Micro Station ( Fon Antana Tung ) bin nawlang accoza nynh a paccyn vae. 2013 kum lungkhu kya, tuh e mua kya tuh Fon Antana Tung bin lang cite accoza nynh paccyn naw ahoi. Phua Ks 150,000,000 / (ccin 1500) budget a ccah vae cite accoza nynh a ho. Tuh thuakeiccuze, e fon tung oun bin kou hae tetuh Zotung ram e khua takyh kya GSM Hand Fon mang kho oun thua vae cih cite ngaehoy lang a um.
Vae ram lungkhu Sibawi Siainn ccan 1 bua oun hung chih vae cih hae.
Vae ram hynh Sibawi sia inn ccan 4 a um. Tuh e hae tuh 1. University of Medicine (1) Yangon. 2. University of Medicine ( 2 ) Yangon. 3. University of Medicine Mandalay, 4. University of Medicine Magwe nynh a thua. 2013 kum Shan pine, Taung Gyi khua kya hynh Sibawi siainn ccan kheit bua nung chih lang vae cite a ccoza nynh paccynaw a hoy.
ZSDP nynh VCD khoi a pou sah vae.
Zotung ram Razua khua kya baebu siainn ccan kheit nung kho nawlang cite saduhthaw kute rya a haetu, Zotung Solidarity & Development Program = ZSDP nynh VCD khoi a tho paw tuh 2013 January 13 nin kyaYangon khua te pou sah a thua vae. E ZSDP Buu tuh American te Paaw Kaw Bawi, Paaw Tho Kung , Rev. Kaw Kung te Yangon khua e tuanaw hoipaw Piccan hae ryte abapi lang thadyn khaepaw thuazah, Baebu lang te Master Degree a kae ccia mang hae paw Rev. Paul Thawng Tin ( Union Theology College/ Philipine) te Pastor Kham Bawi Lian ( Myanmar Institution of Theology) hae hynh taenin naw cia te Scholarship a pya tu nynh a thua.
Zotung Conference tuh April saw kya Tingsi khua tua a thua cih.
ZLB = Zotung Lung-ngin Buu nynh paccyn paw Zotung Conference te thawzue poi tuh 2013 April 16 – 20 cia Tingsi khua kya tua a thua cih cite a nin saw khah phe ria lang a khia vae hae. E Conference kya abapi lang te ho kulang paw tuh, Zotung ram kya Ukkunaw (Political), ngedannaw, kaethungnaw, thyahawnaw …cth… te a phinphin lang te byatyn byare hokunaw te khuakhan kunaw a um cih cite ZLB EC hae nynh a ho hae. ZLB poi hynh langmaw  ZSBB poi khah, a thaw langte a min ru lae te bua tua chui paw nynh a thua cite ZLB lupi Paw Za Le Thang nynh a ho.Zotung minphuin balyn nynh ngaehoyte bebe thua bua kho naw zuaku kalan si oh.
Yangon Zotung Baptist Church Beik-inn
Yangon Zotung Baptist Church Beikinn tuh 2012 November 10 nin te Beikinn sah atho vae hae. E Beikinn pi tuh a kopaw pei 31, a saepaw pei 51 te khan nin lang te anlae Inn ( Taeh inn ) lang te nynh a sah hae. Inn sahnaw me phua Ks- 70,900,000 / a thang cih. Innmin laephi Pei 60 x 80 kya sah hae zah e beikinn a pe kya hin Pastor inn lang cite khan 2 paw , pei 18 x 24 paw inn khah Ks 17,500,000 / te sah bia lang cite 12.01.2013 kya YZBC Kriccaw Buu Mass Meeting kya bya pae naw a hoi hae. “Abalyn inn min me te inn sah naw me pong pylang ze, Ks .120,000,000 / (Ccin 1200) hang a thang cih zah,  2013 May saw kya tuh oun lyn vae cih hae” cite YZBC Kriccaw lupi Paaw Khua Phung nynh a ho.
Laephi pi kya innlae pae lang ccia ry a um huacce naw ram 25 kya vae ram mah a pabua.
2013 hanlang Ram 200 lae kyaze  innlae pae lang ccia ry a um huacce paw  ram 25 khah TIMES mekazin nynh po zah, tuh e kyaze vae ram mah number ccan haw naw kya a pa bua. Langmaw lyatuh vae ram hynh ukkunaw a nya hua naw ram cite ramccan ccungccaw hae nynh dua a thua ry leinaw hae ram thuasahlah zemah, atu a thaw te tuh Asia ninthua lang e ram lungkhu kya pae ry a um hua paw ram lang a tang vae cite TIMES mekazin nynh a ho. TIMES mekazin hynh laephipi kya ze a minthang hua cce paw mekazin nynh a thua. 2012 kum kya ramccan te vae ram lang inn lae oun pae hae paw ramccan ccungccaw milu 3,000,000  lae cih zah, 2013 kya tuh, hynh laeze a leih te oun lung hua cih cite a ho hae. Laephivaw number ccan kheit naw inn lae pae ry a um huacce naw ram tuh Pinccih (France) ram thuaza, ccan nin naw tuh American ram nynh a thua cite TIMES mekazin nynh a ho.
xxxxxxxxxxxxxxxxxxxxxxxxxxx
Syntaw //      // Atu sawpaw kya e tuh ccaw zei langpaw a lung keiccuze, sakhung phan bia khonaw a um khyh paw hynh ccaw ria tu hae beih oun lah thae pah thya oh cite sawtua naw te kae ngia oh.
Copy
Seccaemanglahpi

 

ျပဳျပင္သည့္ေန႔ - တနလၤာ, 21 ဇႏၷ၀ါရီ 2013 21:19  

မဲန္ဘာ မ်ားသာ မွတ္စု ေရးခြင့္ ရိွသည္။

အထူးစာမ်က္ႏွာမ်ား

မဲန္ဘာ စာမ်က္ႏွာမ်ား

အ၀င္ တံခါး


Click to join Seccae

Seccae Yahoo Group

တိုက္ရိုက္ အီးေမးလ္၊ seccae@yahoogroups.com

မွတ္စု စာေရးသူမ်ား

  • bawi thang
    8
  • jef chinchin
    7
  • admin
    3
  • phuasoenaing
    1
  • zawmoe
    1

ေမးပါရေစ

ခ်င္း ဆိုသည္မွာ
 

အြန္လိုင္း ရိွ ဧည့္သည္

 ဧည့္သည္မ်ား 6 ေယာက္  အြန္လိုင္း ရိွေနၾကသည္သည္။

လွ်ဳပ္တပ်က္ ဓါတ္ပံုမ်ား

လက္ေရြးစင္ စာမူမ်ား

ေၾကာ္ျငာ လက္ခံသည္

အဆင့္ျမင့္ ၀က္ဘ္ဆိုက္ ဒီဇိုင္း

  • အဆင့္ျမင့္၊
  • စနစ္က်၊
  • လွပ ျပီး
  • ေစ်းႏႈန္းခ်ိဳသာစြာျဖင့္
  • သင္ စိတ္တုိင္းက် တည္ေဆာက္ေပး ႏုိင္ေၾကာင္း....

၀က္ဘ္ဆိုက္မ်ား ပံုစံမ်ား

  1. ဇိုတုန္
  2. ျမန္မာ စတိုး
  3. အဂၤလိပ္၊ ျမန္မာ၊ ဟားခါး၊ ဇိုတုန္ အဘိဓာန္
=> ဆက္သြယ္ရန္

သင္သိရဲ႕လား?

ေအာက္ပါ လင့္ခ္မ်ားကို အသံုးျပဳျပီး ဤ ၀က္ဘ္ဆိုက္ ကို ၾကည့္ႏုိင္သည္။